Java e fundit e Kampionatit Kombëtar të futbollit për Kategorinë e Parë ka pasur në fokus skuadrat që luftonin për vendin e dytë në të dy grupet A dhe B, pasi dy kryesueset e grupeve respektive, Dinamo dhe Egnatia e kishin siguruar kualifikimin në Superiore më herët.
Në Burrel, stadiumi “Liri Ballabani” ka përjetuar një duel shumë interesant, atë Burreli-Dinamo. Ndeshje kjo, që nëse vendi i parë në grup nuk do të ishte firmosur më herët, do të kishte qënë tejet kulminante. Megjithatë, matjanët, të cilëve u duhej patjetër fitorja për të marrë vendin e dytë, kanë luajtur shumë të mobilizuar dhe falë golave të shënuar nga Farruku 7′ dhe Rexhepi 75′ kundrejt golit dinamovit me autor Alillarin në limitin e ndeshjes, 90′, e kanë fituar të gjithë ndeshjen me rezultatin 2 me 1. Me këtë fitore tre pikëshe, Burreli i udhëhequr gjatë të gjithë sezonit nga trajneri shkodran, Samuel Nikaj, renditet i dyti në tabelën e klasifikimit, që do të thotë se është akoma në lojë për kualifikimin në Superligë. Sipas rregullores së FSHF-së, Burreli, i dyti i grupit A do të ndeshet me Tomorrin, i dyti në grupin B, i cili sot fitoi me Besen 4-2. Betejë kjo që vlen shumë sepse fituesi i këtij çifti do të diskutojë mundësinë e kalimit në Superiore me skuadrën që do të renditet në vendin e tetë të Kategorisë Superiore.
Përtej interesit që kishin fitoret e skuadrave të dyta në të dy grupet, emocionet më të mëdha i kishin ceremonitë e organizuara nga FSHF duke i dorëzuar trofetë përkatës dy skuadrave kampione të grupit A dhe B, Dinamos dhe Egnatias. Dy skuadra këto, që edhe pse kanë firmosur kualifikimin në Kategorinë Superiore për sezonin e ardhshëm futbollistik, do të diskutojnë me njëra tjetrën finalen e madhe për të kurorëzuar kampionen e Shqipërisë për kategorinë e Parë.
Rezultatet e javës së fundit
PLAY-OFF, GRUPI A
BURRELI DINAMO 2-1(Golat: Farruku 7′, Rexhepi 75′ /Alillari 90′)
VORA-KORABI 1-5(Golat: Segero 60′ / Skuka 28′ , 67′ , 77′ , 89′ (p), Murrja 90+2′)
PLAY-OFF, GRUPI B
EGNATIA-POGRADECI 4-2(Golat: Krasniqi 7′, Shtubina 16′ , A.Magani 18′, 69′ / Laçka 62′ , Abazaj 81′)
BESA-TOMORI 2-4(Golat: Lila 54′ , Muzhaqi 77′ / Oshafi 35′, 37′, Canka 59’, 88’)
PLAY-OUT, GRUPI B
LUSHNJA-ELBASANI 1-1(Golat: Mone 49’/Karati 65’)
FLAMURTARI-TURBINA 3-1(Golat: Diamanti 4’, Metani 75’, Gegaj 86’/Jaupaj 77’)
