Kombëtarja shqiptare regjistroi një tjetër fitore në shtëpi në UEFA Nations League, duke mposhtur San Marinon 2-1 në “Air Albania”. Kuqezinjtë zhvilluan një ndeshje të luftuar dhe, falë dy golave të Kristjan Asllanit, arritën të marrin tri pikë të rëndësishme, që e rikthejnë Shqipërinë në vendin e parë të grupit C1 pas katër ndeshjesh.
Trajneri Rolando Maran e nisi ndeshjen me këtë formacion titullar: Dajsinani (GK), Hysaj, Gjimshiti (C), Ismajli, Mitaj, Pilo, Asllani, Shehu, Hoxha, Muçi, Manaj.
Shqipëria e mbylli pjesën e parë në avantazhin 1-0 ndaj San Marinos në “Air Albania”. Kuqezinjtë e nisën mirë sfidën dhe zhbllokuan rezultatin në minutën e 11-të me një goditje spektakolare nga distanca të Kristjan Asllanit.
Shqipëria vijoi të krijojë raste, me Manajn që goditi shtyllën në minutën e 22-të dhe pati edhe një tjetër mundësi të mirë në minutën e 37-të, por portieri mik reagoi në kohë.
San Marino provoi disa herë nga distanca, por Dajsinani ishte i vëmendshëm dhe mbajti portën të paprekur.
Shqipëria e nisi mirë pjesën e dytë, por në minutën e 65-të San Marino barazoi rezultatin me Lazarin, pas një harkimi nga e majta.
Kuqezinjtë reaguan dhe krijuan disa mundësi për të rikthyer avantazhin, me Dakun, Uzunin dhe Asllanin, por pa sukses.
Në fund, pas një prekjeje me dorë në zonë dhe ndërhyrjes së VAR-it, Shqipëria fitoi një penallti në minutën e 90-të. Kristjan Asllani u tregua i saktë nga pika e bardhë dhe shënoi golin e dytë, duke i dhënë Shqipërisë fitoren 2-1 në “Air Albania”.
Kombëtarja kryeson grupin C1 me 9 pikë pas katër ndeshjesh, duke lënë pas Bjellorusinë dhe Finlandën me nga 7 pikë.
Sfida e radhës për kuqezinjtë është më 12 nëntor ndaj Finlandës në stadiumin “Air Albania”, në orën 20:45.
