Ekipi i volejbollit Vllaznia për meshkuj ka nisur përgatitjet për sezonin e ri sportiv. Nën drejtimin e trajnerit Artan Kalaja dhe kolegut të tij Ermal Kraja, skuadra është konsilidimit të saj. Dhe, krahas të tjerave, ajo që bie në sy është rikthimi në Shkodër i treshes së njohur, Gledis Lloshi, Klaudio Preka dhe Tuad Drinazi.
Sezonin e kaluar sportiv, treshja në fjalë, Lloshi, Preka, Drinazi luajtën për ngjyrat e skuadrës korçare Skënderbeu, ndërkohë që për sezonin e ri sportiv, 2023-2024, ato pritet të jenë pjesë e Vllaznisë, skuadrës ku janë rritur si volejbollistë. Hapi i parë në këtë drejtim është bërë me Gledis Lloshin, i cili në fakt ka dy-tre ditë që ka nisur përgatitjet në gjirin e ekipit kuqeblu dhe në ditët në vazhdim pritet që të zyrtarizohet edhe me firmosjen e kontratës me Shoqatën e Volejbollit Vllaznia si dhe Bashkinë Shkodër.
Rikthimi në Shkodër i 29 vjeçarit Gledis Lloshi, konsiderohet mjaft pozitiv për skuadrën e drejtuar nga tekniku Kalaja, pasi kemi të bëjmë ne një nga pasuesit më të mirë të kampionatit shqiptar, i cili jo shumë larg në kohë u shpall kampion me Vllazninë nën drejtimin e trajnerit mar Kroqi.
Por, në të njëjtën kohë, shumë pozitive konsiderohen edhe dy rikthimet e tjera, Klaudio Preka dhe Tuad Drinazi, volejbollistë këto, që përpos Vllaznisë dhe Skëndërbeut ku ishin titullarët kryesorë të formacionit, kanë luajtur edhe në kampionatin e Kosovës.
Për Preken, thuajse gjithçka është e mbyllur dhe pritet t’i bashkohet skuadrës në stërvitjen e ditës së hënë, ndërkohë në lidhje me Drinazin, megjithë dëshirën e dy palëve, sportistit dhe klubit Vllaznia, duhet pritur verifikimi i gjendjes së tij shëndetësore, pasi për momentin ka një shqetësim dëmtimi në këmbën e djathtë, dhe vetëm pas konfirmimit të stafit mjekësor do të vendoset nëse, do t’i bashkohet skuadrës në stërvitje apo jo.
