Që prej hedhjes së shortit kur u mësua kundërshtari i turit të parë të UEFA Europa Conference League, Linfield FC, skuadra e Irlandës së Veriut, tifozëria shkodrane në diasporë ka nisur përgatitjet për të mbështetur Vllazninë në ndeshjen e parë që luhet me 13 Korrik, ora 19:45, në National Football Stadium at Windsor Park, Belfast, Irlandë e Veriut.
Për të ndjekur live skuadrën e zemrës, duket se ka një interesim maksimal nga fansat kuqeblu të disporës. Nga informacionet paraparake bëhet e ditur se komuniteti shqiptar që jeton në Irlandë, si dhe dhe Irlandën e Veriut, ka njoftuar praninë e tyre në stadium. Mes tyre, ai që spikat është ish arbitri i futbollit Bardh Maçi, që do të udhëtojë nga Irlanda ku jeton prej vitesh me familjen e tij për ta ndjekur live në stadium këtë ndeshje. Madje, Maçi ka publikuar edhe bileten që e ka siguruar prej disa ditësh.
Por, ajo që spikat më tepër është një organizim masiv që po bëhet në Angli, aty ku gjendet edhe bërthama kryesore e tifozërisë kuqeblu. Nderim Grabolli(Nero Dobraçjani FB), vëllezërit Omi, Taulanti dhe Enkeleidi, Fatbardh Kastrati, Artan Zeneli, është një pjesë e grupit, i cili ka qënë aktiv edhe në ndeshjet e mëparshme.
Efekti organizues i tyre u pa qartë edhe në ndeshjen që Vllaznia e futbollit femra luajti me Çelësin në kuadrin e Ligës së Kampioneve për ndeshjet e fazës së grupeve.
Thuajse në ato përmasa, do të jetë mbështetja e tifozëve të diasporës që jeton në Britaninë e Madhe edhe në sfidën e parë të Conferencë League për Vllazninë e meshkujve ndaj skuadrës vendase të Linfield.
“Ju Lutem Shperdajeni
Njoftim: Ftojmë të gjithë Vllaznit Kuq e Blu Në Mbretërin e Bashkuar që kanë mundësi dhe dëshirë të vijnë, Të enjten, data 13 korrik, ne Oren 15:00 të mblidhemi në Bar Ryan’s Bar & Belfast
116-118 Lisburn Rd, Belfast BT9 6AH, United Kingdom
Dhe së Bashku ta përcjellim ndeshjen e parë të UEFA Conference League kundër Linfield! Vllaznit në përkrahje të luanëve tanë . Për fitore. Për Vllaznin. Ju mirëpresim.”, shkruan në rrjetin social, tifozi kuqeblu, Nderim Grabolli, apo Nero Dobraçiani, siç e njohin miqtë e tij në FB, teksa publikon edhe bileten e rezervuar me këtë rast, së bashku me disa foto sportive, mes të cilave edhe lokalin, vendin e takimit në Belfast, si dhe numrat e kontaktit të tijin si dhe të kolegut Enkeleid Omi për të interesuarit.
Por, jo vetëm nga Mbretëria e Madhe ka interesim për të ndjekur Vllazninë në sfidën e parë të transfertës verioirlandeze, sepse nga sa mësohet shumë tifozë kuqeblu do të udhëtojnë nga Europa, por një pjesë e mirë ka arritur të sigurojë vizat për të udhëtuar edhe nga Shqipëria dhe konkretisht nga Shkodra. Që do të thotë se mbrëmja e së enjtes në Belfast do të jetë e tërë shkodrane, me një tifozëri entuziaste, e cila shpresojmë dhe besojmë se do të shpërblehet me një lojë dhe rezultat pozitiv nga skuadra kuqeblu.
Gaspër MARKU
